Занозанӣ аз рӯйи Шабнами Сурайё?!Остони Азиз овозаҳоро рад мекунад


 Чандест, ки дар шабакаҳои интернетӣ навори занозанӣ дар Loft—клуб паҳн гашта, сару садоҳои зиёдеро дар байни мухлисони ду ситораи эстрадаи тоҷик-Шабнами Сурайё ва Остони Азиз ба вуҷуд овардааст. Дар навор Остон ба назди мизи Шабнами Сурайё рафта, ба гӯши ӯ чизе мегӯяд, баъди ин дар клуб занозанӣ сар мешавад. Аксарият бар он андешаанд, ки байни ҷавонон аз пушти Шабнам занозанӣ сар зада, Остони Азиз барои пуштибонӣ аз ҳамкасбаш мушт хӯрдааст. Барои фаҳмидани ҳақиқати ин овозаҳо, мо роҳи хонаи Остони Азизро пеш гирифтем.

Аксарият бо шунидани номи журналист гиреҳ бар ҷабин зада, зуд дарашонро мепӯшанд,  вале ҳамсари Остони Азиз моро ханда бар лаб пешвоз гирифт. Сари як пиёла чой мо бо ин ҳунарманди ширинсадо суҳбати ҷолибе доштем, ки фишурдааш пешкаши шумо, хонандагони азиз мегардад.



 
 Чаро Остони Азиз камнамо шуд?
-Пештар садои Остонро дар тамоми гӯшаҳои шаҳр шунидан мумкин буд, вале вақтҳои охир хеле кам тарона эҷод мекунед. Ҳавсалаи сурудхониатон магар пир шуд?
Ҳар рӯз дар чашми мухлис намудор шудан гирӣ, бе қадр мешавӣ! (Механдад) Ҳазл мекунам. Ман албатта бекор нестам, вале як одати хуб ё бад дорам, ки то суруд ба дили худам нашинад ва ҷонам аз шуниданаш роҳат накунад, онро ба мардум пешкаш намесозам. Чанд суруди обнарасида дорам, Худо хоҳад боз андаки дигар коркард намуда, баъдан таронаҳои навамро пешкаши мухлисон месозам.



Табъу завқи ҳар кас ҳар хел аст. Мабодо ягон мухлисатон ба сурудҳои шумо эрод бигирад, асабӣ шуда, бо ӯ даст ба гиребон мешавед ё ранҷишатонро нишон намедиҳед?
-Бехато фақат Худованд аст, одамизод хоҳ-нохоҳ дар ин ё он ҷо хато мекунад. Ман баръакс хурсанд мешавам, вақте ки камбудиҳоямро дар рӯям мегӯянд. Шояд дигар овозхонҳо аз эродгирии мухлисон ранҷанд, вале ман кӯшиш мекунам, ки камбудиҳои сурудамро ислоҳ намоям.

-Шояд аз ҳамин сабаб мардум, хоса ҷавонон шуморо сахт дӯст медоранд. Як гурӯҳ духтарон аз вилояти Суғд дар орзуи он ҳастанд, ки Остони Азиз дар шаҳри Хуҷанд консерт диҳад ва онҳо бо шунидани таронаҳои овозхони дӯстдоштаашон роҳат кунанд. Ба бонувони суғдӣ ваъдаи дидор дар саҳнаро дода метавонед ё барои сафари ҳунарӣ намудан вақту имконият надоред?  

-Ман мардуми фарҳангдӯсти вилояти Суғдро хеле  дӯст медорам ва ҳурмату эҳтиром мекунам. Ба қадри имкон кӯшиш хоҳам кард, ки вақтҳои наздик дар шаҳрҳои Истаравшан, Панҷакент, Исфара ва Хуҷанд консерт барпо намоям. Рӯзу соаташро ҳоло аниқ намегӯям, бигзор барои мухлисони хуҷандии банда сюрприз шавад.


               

     Дар боби ишқ ва рашк
Шумораи мухлисдухтарони шумо аз мӯйи саратон ҳам зиёдтар будагист. Янга рашк намекунанд?

— Ҳамсарам духтари бофаҳм аст ва хуб медонад, ки мухлисонам барои ман мисли хоҳар ҳастанд, барои ҳамин рашку итоб карда, ҷонамро ба лабам намеорад.

Бо янга дӯст дошта хонадор шудед ё  ин ганҷро барои шумо волидонатон пайдо карданд?
Мо якдигарро аз нигоҳи аввал дӯст дошта, хонадор шуда будем. Худованд ба кас шуҳрату обрӯ диҳад, баъзан бахт намедиҳад, вале хушбахтона ману ҳамсарам тавонистем, ки даст ба дасти ҳам дода, бо ҳамдигарфаҳмӣ ва меҳру муҳаббати пок оилаамонро аз шикасту бадбахтӣ эмин нигоҳ дорем.

-Шумо ҳамчун мард хушбахтии худро дар чӣ мебинед?
-Шуҳрат, обрӯ, пул, ин чизҳо ҳама муваққатӣ ҳастанд. Мояи асосии хушбахтии инсон оилаи солим аст. Ман ҳамсари оқилаю боиффат, хонаи обод ва 5 фарзанди гул барин зебо дорам. Магар хушбахтӣ аз ин зиёд мешавад?

-Фарзандонатон бо роҳи падар рафтаниянд ё касбҳои дигарро интихоб кардаанд?
-Айни замон чаҳор фарзанди ман дар мактаби миёна бо баҳои аъло таҳсил карда истодаанд, хурдиаш ба боғчаи бачагона меравад. Онҳо дар оянда кӣ мешаванд, ҳоло маълум нест, вале мабодо ягон нафарашон роҳи маро интихоб кардан хоҳад, албатта ба қадри имкон дастгирӣ менамоям.

 Ансамбли “Анис” пароканда шуд?

-Бисёриҳо бар он ақидаанд, ки ансамбли оилавии Азизовҳо пароканда шудааст ва ин гурӯҳ дигар фаъолият намекунад…?
Ансамбли овозадори «Анис» побарҷост ва анъанаҳои асосгузорони худро давом медиҳад. Мо, амакбачаҳо бо сурудҳои якҷоя репертуари худро бой месозем, вале дар баробари ин, ҳар кас бояд роҳ ва маҳсули худро дар санъат дошта бошад.

 Аз овоза то ҳақиқати занозанӣ дар Loft-Клуб
-Зоҳиран бисёр ҷавонмарди оромтабиат ва бофарҳанг менамоед, вале чанде пеш занозании Шумо бо як гурӯҳ ҷавонони ношинос дар Ютуб пайдо шуда, овозаҳои зиёдеро ба миён овард. Мегӯянд, ки ҷанҷол аз пушти Шабнами Сурайё сар задааст ва гӯё шумо ҳамкасбатонро пуштибонӣ намуда, чанд мушт хӯрдаед…
(Механдад). Мардуми тоҷик санъатдӯстанд, вале баъзан чунон овозаҳое мебароранд, ки хандаи кас меояд. Дар асл воқеа чунин буд: Ман бо дӯстам Сино ба Loft-клуб рафтем. Дар он ҷо як гурӯҳ бачаҳое буданд, ки пештар гапашон бо Сино камтар гурехта будааст. Онҳо якбора ба дӯстам ҳамла карданд. Ман магар мард шуда, дӯстамро партофта мегурехтам? Синоро пуштибонӣ намудани маро дида, кадом одами чаққон зуд ин манзараро наворбардорӣ карда ба  Ютуб партофтааст. Ҳамин як моҷарои кӯчак боиси пайдо шудани овозаҳои бисёре гашт. Азбаски Шабнами Сурайё низ дар он ҷо буд, моҷароро обу ранг дода, ҳангома карданд, ки гӯё мо аз пушти Шабнам ҷанг шуда бошем.  Ман Шабнамро ҳурмату эҳтиром мекунам, вале бори дигар мегӯям, ки ба занозанӣ дар Loft--клуб Шабнам ягон дахл надорад.

-Барои суҳбати самимию ошкоро ба шумо як ҷаҳон ташаккур. Муваффақ бошед!
Суҳбаторо: Мумтоз

9-11-2018, 10:28       1 498 просмотров

Поделитесь с друзьями:



Похожие новости